14日Staycation有咩做？比完賽休息恢復好要練習啦！田總和體院為我哋安排咗 Watt bike 同Fitball，可以喺房踩單車做體能保持運動，我有時都會忍唔住腳喺房來回jog吓，不過jog咗20’已經暈暈地🥴 為咗解悶，一邊踩單車一邊睇戲睇風景，望吓體院田徑場上嘅運動員，又再次充滿動力🤩 通常朝早同下午都會踩，有時輕鬆踩時間⏱️有時踩距離當長課🚴🏻♀️有時踩強度或間歇谷吓心肺❤️另外會做core體能，其他時間睇書睇劇同休息😴
其實隔離依段時間一啲都唔孤單 (比起自己一個喺出面集訓)，媽咪會送來靚湯同煮家菜，田總、Nike、教練和好友不時送上生果同零食，收到滿滿嘅祝福好幸福🥰 今日完成隔離，可以出去跑啦！🏃🏻♀️😄
跑步除咗練跑，都要練體能鍛鍊肌力，有助減低受傷機會，跑步嘅體能訓練主要針對核心肌肉、大腿和臀部肌肉，我習慣練完跑喺運動場做核心肌肉訓練。另外，一星期有一課去健身室做體能訓練，練完體能會休息或者輕鬆慢跑30分鐘，翌日盡量避免進行高強度訓練，疫情期間無健身室用就喺屋企運用阻力帶和健身球保持適量體能訓練。
每人所需要鍛鍊嘅肌肉都會有啲唔同，有啲人左腿後肌較弱，有啲人右邊腰較緊。可以針對地進行體能訓練，我自己腳腕受過傷，會再做些訓練去鍛鍊腳嘅小肌肉和加強腳腕穩定性，所以除咗一般體能外，可以按自己需要去鍛鍊和強化自己。
世界半馬拉松錦標賽🇵🇱 World Athletics Half Marathon Championship Gdynia, Poland
今次比賽跑到PB特別有意義，疫情最嚴重嘅時候，跑步都要帶口罩😷為咗繼續練習，教練會車我去啲山旮旯地方練跑，又試過天未光跑喺吐露港跑，Gym room無開嘅時候去平台花園俾蚊咬住做訓練，依啲嘢阻唔到我要練習嘅決心，堅持下去先會見到希望💪🏻賽前做5000m 同10000m time trial 都有狀態😊以為難關已過，可以安心跟隨大隊 (有偶像潔貞😍)去波蘭比賽，點知...
原定航班係由香港飛去荷蘭，荷蘭轉機去波蘭，到機場先知喺荷蘭轉機需要出入境，並須政府領事館簽證，雖然我哋持有大會發出嘅證明文件但係都不被接納。 幾經波折，臨時重買機票，先飛去倫敦，轉機去波蘭首都華沙，再轉內陸機去大會指定機場，飛咗十幾二十個鐘再搭45分鐘車終於到酒店，先做檢測，等咗一個鐘出陰性結果，可以休息了！
賽前2日嘅天氣都係陰天，好多雲，不時落雨，近沙灘條路仲大逆風，可能搭長途機原故適應跑時對腳仲攰攰哋，好彩一到比賽就醒醒定定俾我按教練計劃嘅配速完成任務！
因為疫症，大會喺今次比賽都落咗唔少功夫，一到機場有防疫包 (內有口罩，消毒紙巾同消毒酒精)，選手有限定training and warm up area, 其他地方均須戴口罩，膳食大會安排喺酒店餐廳食，拎嘢食要戴口罩同手套，當然食嘢就除口罩啦。比賽當日喺酒店分批roll call, 全程戴口罩，call完就要比賽裝束出去起點 (天氣都有啲凍，想著件便利雨衣出去都唔得)，距離開跑仲有10分鐘就除口罩準備起步，跑完返終點工作人員會派口罩即刻戴返。
第一次參加世界賽雖然好多波折，但能夠見識點樣喺疫症下搞世界賽，遇上唔同國家嘅跑手，自己更更更努力多十萬倍先得。返香港後要隔離14日，雖然比一個賽要離家21日，但今次經驗同能夠成功突破自己，一切都值得！關關難過關關過💪🏻
狀態總有起有跌，跑得好嘅時候我會珍惜同享受，用心好好記住個感覺，並用文字記錄在訓練日誌上，比賽前或當跑得唔好嘅時候睇返，提醒自己狀態好嘅時候係點，好讓自己記返起個感覺。
跑得唔好嘅時候我會唔開心、失落、對自己無信心等等，好多負面情緒出來，但我只會俾自己最多唔開心一晚，瞓醒第二日重新出發，因為繼續鑽牛角尖係無好結果。教練通常會同我作出檢討，揾出問題和原因，同我傾，提我要正面積極面對每個難關，只要按步就班，專心認真地繼續做好練習，狀態會慢僈提升，又再開開心心跑。
前排好多時一到黃昏時間練跑就落雨，落雨跑步的確會令好多人卻步，但比賽都有機會落雨，所以落雨從來都唔係唔練習嘅藉口，應該好好把握機會鍛煉自己，要點應付雨天練習呢? 我會戴帽遮風擋雨，帶齊替換衫褲、風褸、毛巾、拖鞋，練完立即抺乾換衫，再喺有蓋位置拉筋cool down，返到屋企盡快沖熱水涼，吹返乾個頭，飲杯黑糖薑母茶驅寒補身。訓練計劃因應天氣可以調整，例如原訂間歇跑的話，可轉為配速跑或慢跑，避免喺雨下靜止停留時間淋太耐。咁跑完對鞋濕哂點算好? 我會塞報紙，臨瞓前再換一次，第二朝對鞋就乾哂，依個方法教練教嘅，好work👍🏻
雖然落雨可以跑，但要選擇安全嘅路面跑，小心地滑，運動場係安全嘅選擇之一，如行雷閃電就唔應該喺戶外跑，非常危險，可以轉喺室內跑或留喺屋企做體能，跑步要注意環境安全啊！
