『心態決定境界』最想開開心心一直跑落去 Kristy

今次訪問嘅學員就係Weman當中嘅成員Kristy啦。

未做今次訪問之前，淨係知道Kristy係一個細細粒粒又開朗又跑得嘅女仔。估唔到Kristy一路以來喺運動嘅路上有咁多辛酸，曾經有厭食同埋暴食症、曾經喺三鐵比賽中途炒車。不過當中最令我動容嘅反而係Kristy喺訪問內容中對呢啲經歷只係輕輕帶過，更着重喺自己點樣保持正面同埋繼續堅持落去。真係令我驚嘆佢小小嘅身軀入邊有大大嘅力量呢!

 點樣開始接觸長跑

原來Kristy曾經喺小四嗰陣做體適能測試，9分鐘耐力跑意外地跑左千六米。Kristy同左佢當時嘅游水教練講，佢就想訓練Kristy玩水陸鐵人，開始教Kristy跑步。之後Kristy喺小學到中三都有玩下學界啲中長跑，但Kristy果陣又怕跑步腳粗，而學校田徑又淨係專注短途同跳遠，之後又有厭食症同暴食症，所以中四就專心讀書就冇再跑。

一直到大學畢業之後，Kristy覺得生活只係得番工作好無聊，咁啱見佢嘅中學師姐暨偶像粉紅大佬Leanne喺公司附近開班，就重新跑番。

加入Weman之後嘅改變

Kristy認為加入咗Weman之後訓練有系統咗好多，以前淨係上堂果課有課表，其餘時間都係自創啲野跑下，鐘意就easy/tempo/fartlek/interval都係隨心。但而加文少杰教練會俾一個月嘅programme，連pacing都有埋，令Kristy可以對每一課都有生理同心理準備。而且文少每課都會俾comment，令Kristy對自己嘅狀態更了解。Kristy亦提到喺weman仲有一班好supportive嘅隊友，可以一齊跑，仲要大家都係女仔，會好了解大家，咩女人心事都可以分享，仲話麻煩晒文教練湊佢地添。

長跑路上嘅啟發

Kristy喺第一次玩三鐵Ironman70.3嘅時候，單車去到75公里果陣因為落斜太心急，想追番之前上斜慢咗嘅時間，好快咁衝落去。但Kristy憶述當時自己技術唔夠好炒咗車，頭盔爆開咗，成個左邊側身損晒，半隻門牙崩咗，但附近冇救護站又冇工作人員。如果Kristy唔踩埋番去就要搬架單車著lock鞋行落山，仲要行15km，所以Kristy就硬住頭皮踩番去。當Kristy踩到轉換區播緊 ”What doesn’t kill you makes you stronger”，令Kristy好鼓舞，覺得自己咁都冇事點都要跑埋佢，最後1:51完成半馬部分，6:04完成整個賽事。 

呢場比賽令Kristy覺得「心態決定境界」哩句好啱，即使而加都未太拿捏到比賽個心態，Kristy仲笑言場場都想pb唔通場場都pb。但Kristy覺得要有決心同信心果陣先會跑到理想嘅成績，但有時俾自己太大壓力又會弄巧反拙，所以成日都要同自己self-talk下先得。 

長跑對自己嘅意義

Kristy認為長跑係一樣令到自己同人地唔同嘅野。Kristy就話自己唔係靚女，讀書又唔係叻，又冇一技之長，只係個普通打工仔。如果冇跑步，生活應該就得食訓痾同番工。Kristy仲話識佢嘅人都知佢好隨意好hea，只有跑步嘅時候，先會搵番份執著，先會見到佢認真少少，有火少少嘅模樣。Kristy表示最鐘意跑步嘅時候可以只專注一個目標，走想走嘅pacing，冇其他野要諗，又唔會有人煩住自己，好鐘意自己拎番生活主導權嘅感覺。仲話呢兩年如果冇跑步精神上支持住自己，應該會抑鬱。

 長跑路嘅終極目標

Kristy就話終極目標就係長跑長有，希望自己嘅身體可以負荷到訓練量。而短期嘅目標就係希望30歲前10km可以見到40分，之後就玩多啲長距離嘅比賽，亦想自己肌力可以增強，練成腹肌，繼續開開心心咁跑～

RMAC Trial 2021 5000米 - Ivan

對於早前5000米測試，筆者最後搵到文教練分享吓佢對Ivan今次測試嘅睇法(Ivan(17:40)。文教練認為Ivan做到今次嘅成績實在唔簡單，由於家庭同工作關係，抽時間練習俾其他人更加困難，呢個成績實在係得來不易。

雖然Ivan希望做到更好嘅成績，但文教練認為就今次嘅測試而言，呢個成績已經係比預期內算好。因為文Sir就Ivan練習反映出黎嘅狀態，預測到測試嘅成績係大概18分內。

除此之外，文教練亦特別講到Ivan在內嘅幾位上水班嘅同學因為家庭同工作上嘅關係，要自己抽時間去練習係比較辛苦。呢幾年嚟，Ivan都要日出時份去練習，所以要有恆心咁堅持去練習更加唔簡單。

最後文Sir希望Ivan可以繼續努力，唔好俾傷患阻礙到佢練習，可以繼續喺唔同嘅項目裏面突破。

RMAC Trial 2021 5000米 - 仕謙

原來喺嘅5000米測試入面，另一位做到18分內成績嘅學員—仕謙(18:1017:59)，都係陸sir嘅學生。不過陸sir喺今次測試為仕謙定下嘅目標比較高，認為仕謙嘅成績可以發揮得更加好。

陸sir話仕謙今次啱啱好18分內嘅成績，其實佢練習嘅時候都做咗一次。所以今次測試呢陸sir比仕謙嘅目標就高啲，但未能做到一個好好嘅時間，都係發揮平時做到嘅嘢。

陸sir覺得未達標係同仕謙當日臨場表現有關，同埋仕謙喺測試前幾個星期比較多自己一個做練習，未能完全清楚佢嘅狀況。陸sir就認為仕謙可能喺調整方面，可以再做得好啲。

未來陸sir都希望仕謙可以多啲參與練習，多啲跟志華跑比較快嘅步速，跟上快啲嘅節奏，咁就可以快啲提升仕謙嘅狀態。

RMAC Trial 2021 5000米 - Juno

喺5000米TT中，問到最令陸sir驚喜嘅隊員呢，陸sir就話係Juno(19:3618:01)。

Juno喺一月左右先加入陸Sir組，當時Juno嘅狀態同能力都冇而家咁好。陸sir認為Juno呢幾個月好努力，好積極咁問佢攞建議，之後都有好努力咁去做。

「今次Juno嘅PB嘅時間快咗1分半左右，進步好大，絕對係不斷累積嘅成果，佢平時星期二嘅練習基本上就從未缺席過。」陸sir話只有努力，先會令到Juno可以跑到今次嘅成績。

RMAC Trial 2021 5000米 - 志華

Elite Team陸Sir組成員志華喺5000米測試時做出17分10秒，係測試學員當中最快嘅成績。對於志華今次嘅表現，佢教練陸sir都表示幾滿意，亦都係預期之內嘅成績。

睇下陸sir對今次志華嘅表現有啲咩睇法先：

陸sir話志華平時練習嘅時候，多數負責帶其他同學練習，做一個帶領者嘅角色。陸sir就喺比賽同測試前同志華做左2-3次嘅高強度練習，目的係希望提升佢嘅狀態。事前陸sir都同志華跑左兩個3km，陸sir當時都預計志華應該跑到大約17分頭嘅成績，所以呢個結果係預期之內。

陸sir表示志華未來嘅方向應該都係好似而家咁，因為其他同學嘅狀態同埋能力都提升左。「咁志華都會繼續用帶嘅角色，帶同學一齊練習，同時提升自己嘅能力，喺賽前再做一啲高強度訓練，提升狀態。」

志華做到呢個成績嘅主因就係努力，陸sir話志華平時自己會努力做訓練，唔會擔心帶同學跑會令到自己嘅狀態又或者能力冇提升，亦都好信任佢。

RMAC Trial 2021 5000米 - Alan

尋日提及Elite Team黎Sir對其中一位隊員Oscar喺5公里測試賽跑出唔錯成績嘅睇法，今日就講下另一位隊員，人稱屯門班一哥Alan(17:15 - New PB)

黎sir認為Alan本來嘅狀態係相當好，但由於之後做咗個小手術，Alan練習返都只係幾個月時間。黎sir覺得Alan咁快可以pick up返都唔錯，但就覺得Alan太緊張，以致成績唔係幾理想。

因為原先Alan嘅目標係17分內，而其實測試之前嗰一個月嘅訓練狀態都幾好。但黎sir就認為可能Alan太耐冇比賽，比賽當日個感覺都係有啲緊張，唔夠放鬆。

頭2公里開圈都係目標時間，不過之後就跌速個幅度比想像中大。不過黎sir就話以Alan停咗咁耐，啱啱練返幾個月都跑返嘅呢個時間，都算唔錯。黎sir認為做唔到之前定17分內嘅目標比較可惜，整體有少少失望。但係如果考慮返Alan之前做咗個小手術，咁快就跑返17分15，其實都已經好理想。

黎sir最後亦都話之後Alan做返多啲訓練嘅話，Alan進步個幅度會越來越大。

RMAC Trial 2021 5000米 - Oscar

喺早前舉辦嘅5000米測試，有唔少同學都做到唔錯嘅成績，當中Elite Team Oscar嘅表現令佢教練黎Sir眼前一亮(18:22 17:34)。「某某同學嘅表現我唔意外，反而Oscar今次真係堅呀！」黎Sir喺Oscar跑到最尾兩圈時咁樣同總教練文Sir講。

一連幾日我哋就訪問返教練們對幾位學員喺今次測試表現嘅睇法：

黎sir 表示對Oscar今次嘅成績都幾滿意。

本來黎sir預計Oscar嘅成績係大概17:30至17:45。由於今次嘅測試黎sir都有落場一齊跑，黎sir話佢帶住Oscar跑嘅頭3km 左右個pacing 都啱嘅，而Oscar都跟得幾好。但黎sir覺得Oscar嘅潛力可以更加大，認為Oscar始終都有啲保守。黎sir估計Oscar 嘅實力如果再發揮好啲，有機會跑到17:20附近嘅。就整體而言，黎sir對Oscar嘅表現係滿意嘅，認為Oscar今次發揮穩打穩扎表現不錯。

跑步: 健康同態度比成績更重要 Mick

今次訪問嘅同學就係將軍澳2班嘅Mick啦。

Mick嘅平均每個月里數達到250至300公里。Mick平日大概每日6－10公里，假日就會跑下長課，每月如是。而當問到點樣分配時間嘅時候，Mick就講左句:「每個人一日都只係得二十四小時，只係睇你點樣分配。有啲人會去吃喝玩樂，但對我來講跑步就係我嘅娛樂。」

好難想像喺幾年嘅Mick係一個因為身形同體重受糖尿病困擾嘅人士。今次嘅訪問亦令我哋更加了解Mick點樣為咗健康而接觸跑步，同埋佢嘅心路歷程。

疫情期間點樣維持咁大嘅訓練量

原來Mick喺2020前跑步方面訓練量其實冇咁大，大概每個月150公里以內。因為MICK除左跑步之外亦都好鍾意健身，當時訓練比例係每星期間4－5日健身，2－3日跑步。但疫情期間因為所有健身埸所暫停開放，MICK運動既時間就投入埋去跑步方面，多左去跑街。不過同樣由於疫情之下，MICK都有啲擔心健康問題，所以盡量選擇喺一大早天仲未亮或者夜晚，人流相對少嘅時段去跑。

喺疫情下練習。MICK亦都有做好防疫措施，由開始時嘗試帶普通外科口罩跑，到之後用坊間嘅口罩架，之後因為跑會推介轉用咗Vent Mask。雖然改善咗普通外科口罩令訓練時呼吸困難嘅問題，但又有另一個問題出現。帶住 Vent Mask，由於外形同當時未有咁多人用嘅關係，一開始大家都會當佢係怪物咁避開佢。Mick表示唯有當自己係一隻野豬咁跑，但佢都冇太介意，去跑步嘅時候仲成日同其他跑友講笑咁話：「野豬又出動喇」

而正正係呢段疫情嘅時間，反而令到Mick嘅訓練量當時每個月可以去到超過300公里，佢仲表示口罩訓練令到佢心肺都好似好咗添。而去到2020年嘅年尾階段，坊間開始出現一啲Virtual 嘅馬拉松賽事，令到Mick嘅月里數再次上升到呢個400公里。 而喺會計算參加者每月里數嘅齊動 Letz Goal X RMAC嘅活動期間，Mick嘅訓練量更試過上到超過500公里。

點解接觸長跑

原來當初Mick曾經係一個215磅嘅肥仔，亦因為咁而受糖尿病等長期病患同三高等問題困擾，佢嚴重嘅時候甚至每日都要食10粒藥控制病情。2017年嘅時候Mick覺得一定要正視健康問題。一開始佢就搵咗營養教練去幫佢調節飲食習慣同帶佢做運動，從而開始接觸跑步同埋體能訓練。當時Mick雖然只能急步行，甚至未可以跑，但佢仍然堅持每日風雨不改咁跑步，由急步行去到緩步跑，距離慢慢由3>5>10公里。一年生活習慣嘅改變同持續運動，令Mick體重由215磅下降到160至170磅，呢段日子亦令到佢病情穩定落嚟，唔需要靠藥物控制病情。此外，佢仲喺期間搵到跑步嘅樂趣，令佢直至今時今日都一直維持良好飲食習慣，同恆常體能同跑步訓練。

點解加入Rmac

Mick就形容佢加入嘅過程有啲搞笑。Mick提到當時幫助Mick改善生活習慣嘅朋友 —「隊長」，而呢位朋友亦係RMAC嘅學員。當初「隊長」提議佢地加入RMAC一齊跑嘅時候，Mick並冇立即答應，只有佢太太加入。Mick太太參加左一期之後鼓勵Mick嘗試吓去試堂先，起初Mick就喺將軍澳二班試堂，試堂後感覺唔錯就再報左下一期跑班。而之後Mick就話自己好似「比人推左落火坑咁」反唔到轉頭，慢慢鍾意左上跑班，今期佢仲報哂將軍澳1班同2班添。

堅持嘅動力同時間分配

Mick認為令佢一直堅持最主要嘅原因就係健康，尤其係跑步幫助到佢減少長期病患嘅困擾，令Mick更加有動力繼續跑。當問到點樣分配到時間去完成咁大嘅訓練量，Mick認為每個人都係有24小時，工作之餘，有人會去吃喝玩樂，而對佢嚟講跑步正正就係Mick嘅娛樂，所以佢都好願意分配多啲時間去跑。 不過屋企人方面，因為Mick放工跑完已經比較夜，就只能同父母分開時間食飯，家中嘅事務就同太太分擔。Mick通常會收工之後抽1個至個半鐘去跑一課，假日就會約埋一班跑友去跑長課，大概十幾至二十公里，有時組下早餐團。Mick笑住話:「人地鍾意揸㗎車去食早餐，我地就用對腳。」跑完就幫屋企買餸同日用品。Mick表示呢種生活方式對佢嚟講反而係一種享受。

跑步對Mick嘅影響

Mick表示跑步改變左佢好多，不論係身體狀況定心態上。首先Mick變得樂觀同積極，覺得只要願意行動同堅持好多事都係可以解決。Mick就用馬拉松嚟舉例，以往跑1至2公里都辛苦嘅佢會認為完成馬拉松好難，但而家嘅佢知道只要肯練習同堅持就可以成功完成。Mick而提到喺跑班上堂時，見到當日嘅program 都會覺得無可能完成，但每次喺大家互相鼓勵之下，最後都堅持完成到整個program。同樣嘅道理佢都用喺生活上，令佢處事嘅心態都變得更加正面。

未來嘅目標

Mick2021年嘅目標希望將10公里時間推向40分鐘內完成，而半馬就喺1小時30分鐘以內完成。雖然Mick知道過程唔容易亦好辛苦，不過佢都會堅持練習，向目標邁進。

比全馬更重要的PB Miranda

今次訪問嘅同學叫Miranda，相信部分香港仔班同上水班嘅同學對佢都唔陌生。而第一次認識Miranda，係話說早幾年某個晚上有個教練打比文少杰總教練話有位同學練到差D暈低左，後來親身認識呢位差少少要人工呼吸嘅同學。一直都對呢位同學好好奇，除左因為佢好似唔跑得但都已經跑晒成個全馬，仲有一次睇新聞見到呢位同學上鏡接受訪問，先知佢原來係青協領袖學院總監，真係估佢唔到。

呢位同學高高瘦瘦，比人感覺係有操開咁，但原來佢以前同運動毫無瓜葛。「新相識的總將我跟運動連在一起。可惜，除了學校規定的體育課外，我從未與運動有任何連結，也沒有利用天生優越的條件去強壯體魄。」

View fullsize

從啦啦隊成為跑手

原來令Miranda接觸長跑，係因為啦啦隊。事緣佢加入母校港大加入啦啦隊為渣打香港馬拉松健兒打氣，親身感受這場國際盛事。見到跑壇高手雲集，市民一齊為選手打氣，呢種氣氛鼓勵到更多人參與運動。當時的Miranda心想:「自己的家(香港)辦一場盛事，我可否也不只為別人打氣，更可推動自己向前一步。」於是翌年佢決定挑戰人生第一個10k。

你能跑完10公里嗎?

「第一個10k」。當時Miranda只有一個目標 ─ 完成賽事。由於工作關係，佢只能盡量抽時間晚上練跑。比賽前一晚，家人同朋友都好擔心，大家都問：「你得唔得㗎？」。 令佢都不禁問自己：「我得嗎？」。清晨五時多的銅鑼灣罕見地熱鬧非常，起跑線的歡呼同熱情比佢嘅答案係 ─ 「得!」。Miranda亦因此堅持完成十公里，第一次以跑手身份完成呢段旅程。作為跑步初哥的Miranda本來只求「唔駛上車」，但衝破終點比佢嘅成功感難以言喻，而證明左佢肯踏出一步的成果。

View fullsize

10k又10k？

如是者，Miranda每年都期待住這「一年一度的約會」，而目標亦變成要突破自己 ─比去年的時間更快。參加10公里賽事數年後，Miranda希望挑戰半馬，一方面是考驗自己韌力，另一方面是尋求進步，並期望利用準備時間較長的賽事保持運動習慣。

Miranda明白由10公里變21公里不止是數字遊戲，更是耐力與堅持的考驗。由於跑程拉長，擦身而過的跑手即使從不相識，都會互相勉勵，令孤獨的比賽加添一份温暖。Miranda喜歡這份令社會更美的愛。跑過數次「21」賽事，Miranda又蠢蠢欲動想挑戰「42」。朋友都不認為佢能抽時間積極練習全馬，所以都善意地提醒Miranda :「唔好揾命搏啦！」、「你食素，夠力氣嗎？」。這盤冷水卻令Miranda向全馬邁進嘅決心更堅定。。。 終於喺2017年，Miranda以素食者身分完成人生第一個全馬拉松。

View fullsize

素食全馬跑手的光環背後

Miranda亦表示用大約10年時間由10公里成為全馬跑手，算不上很快，但這個用汗水同時間換來的「掌聲」確是特別動聽。從一開始Miranda以試一試的心態參加10公里賽事，到超額完成42公里，靠的就是目標、信念及熱誠。從事青年工作的Miranda認為樹立榜樣甚為重要；即使不一定比別人好，但追求卓越的態度是必須的。

所以，素食全馬跑手的光環背後，更重要是令Miranda反省：「真的就只是這樣繼續跑下去嗎？」 佢回想過去每年的所謂「練習」，只是不定期地跑步。有時候放工十一點去跑個半鐘便當練習，或是比賽倒數時參加「雞精班」惡補一下。十年來，只靠一個「勇」字，並沒有打好根基，找準方法。Miranda認為就技術而言，肯定有更大的進步空間，於是佢決定參加跑會。一方面希望能精益求精，另一方面期望能透過定期課程，掌握自己的進度。

View fullsize

尋求突破，入RMAC

Miranda已經想不起當初係邊位朋友推介佢入RMAC跑會，由香港仔班至大埔到北區。。。 佢還回憶起第一次跟「粉紅大佬」Leanne及張sir上堂，單是熱身運動已愈半小時，自稱平日上樓梯都會氣喘的Miranda(即使能完成全馬)，確是難以繼續完成餘下一小時的課堂(當然最終完成了)。但每周的鍛鍊，都令Miranda在一點一點進步。 Miranda言道係以重新學習跑步的心態加入了RMAC家庭，文Sir提點佢要蹬腿，同學水哥提示佢呼吸節奏不妥。。。他們更以「你又走堂？」的問題去激勵及鞭策佢，時刻提醒佢不能因「忙」而忘記對運動的恆心。第二年的全馬，Miranda比去年進步近半小時。對於Miranda而言，這份喜悅，彌足珍貴。數據的意義不止於衝線照片能夠換取的「讚好LIKE」數字，更在於因有系統地學習而得到嘅成果，肯定左佢的付出及毅力，以及教練及同學們的引導。

View fullsize

放下包袱，繼續前進，領創新天

Miranda分享電影《阿甘正傳》(the Forrest Gump)有關跑步的橋段令佢印象難忘。主角的媽媽說，”You’ve got to put the past behind you before you can move on”( 放下包袱，繼續前進)。Miranda認為假如佢只留戀10公里賽事的鬆容，佢不會繼續挑戰21公里賽事，更不會參與全馬賽事；假如佢只依戀全馬光環的掌聲，佢唔會加入RMAC，以求在跑步運動上有更好的發揮；假如佢沒有堅持，佢亦沒有機會證明自己不止「三分鐘熱度」，繼而啟發朋友跑步。

面對工作、讀書、家庭及運動，Miranda下一個更大的賽事便是當「新手媽媽」。臨盆在即，興奮之餘，佢亦曾憂慮呢個係考驗時間分配及角色扮演的高難度動作。但Miranda相信每個人心中都有一位領跑員，只要有目標、信念、熱誠及方法，暫時「停下來」亦只為明日的自己領創新天。Miranda十分期待再次回到RMAC，備戰第四個全馬。

View fullsize

「即使偶有一呼一吸的喘氣、一跌一撞的乏力、一分一秒的疲憊，但途中有你，這一切都是讓我們領創及享受人生另一個『PB』的新開始。」By Miranda

來自教練、隊友及女友的跑步動力 呀謙

深水埗班的謙同學，兩年前喺大學Year 2嘅時候想搵活動參加，毅然報名抽籤渣馬全馬賽事，又咁好彩比佢中籤，因而加入左跑班。自覺初初跟劉德龍教練的訓練內容好辛苦，但教練叫佢要跟住前面同學的背脊，加上遇到好的隊友，一同追尋同一目標，幾辛苦都要堅持。 對佢印象最深刻的一場比賽，原來係喺粉嶺高爾夫球場舉辦嘅一場6小時耐力賽，跑到勁辛苦嘅佢，為左想每圈都見到到場支持的女朋友，所以就不停咁跑，最終仲奪得全場亞軍。 唔知今年再戰全馬嘅呀謙，會唔會再突破自己呢？ 加油呀！

與教練隊友的快樂時光 陳樂昕

讀緊幼兒教育嘅樂昕教練，十年的長跑歲月，最回味都係同教練及師姐們一齊練習的片段，亦都因為大家相處帶黎嘅熱血同快樂，令佢堅持跑步，喺800米以至半馬都屢獲佳績。
喺RMAC青衣2班，有一個同學令樂昕印象深刻，佢覺得呢位同學的熱情同堅持好帶動到整個團隊同自己。
期待樂昕教練再創高峰，再踏頒獎台！

媽媽級跑手 Larissa Tong

跑左15年步的唐嘉欣Larissa，而家係一個全職媽媽，兼職教練及運動員。由以前跟必達體育會到近年跟香港田徑隊日藉教練川尾慎悅，她都獲得很多長跑訓練的模式和技術。
最近幾個月復出參加不同本地長跑賽，跑出不俗的時間，而且每次都能站上頒獎台。雖然花在練習和教跑的時間都唔少，不過佢坦言一定會以女女做中心，會先照顧好她的起居生活。她又希望將來可以讓女兒接觸運動，鍛鍊身體和心智之餘可以有更好的紀律。

努力不會白費 總會找到答案 Crystal 屈旨盈

轉為全職運動員接近一年的Crystal， 過去半年大部分時間都在海外練習或比賽，當中在雲南的兩次集訓令她經歷了最刻苦的訓練，亦令她深深體會到面對傷患的無力感。
雖然在兩次海外馬拉松賽事都未能跑到滿意成績，她亦坦然自己正處於樽頸位，但她相信只要唔放棄，只要再付出努力，最終一定會為自己找到一個答案。

與伴同行 將足跡踏遍世界每座山 Kayi

熱愛行山的Kayi，差不多每個周末都會相約朋友登上唔同嘅山，探索香港獨特美麗的風景。雖然佢又會跑步又會行山，但兩者之間，佢似終覺得行山係最喜愛嘅，而呢項運動都影響左佢好多。 與同伴建立左thehikipedia呢一個IG account，將每次旅途踏遍嘅足跡、狀麗嘅景色呈現比同好者，亦都因為咁多左山友互相交流。 去過印尼Rinjani同沙巴神山，來年Kayi將挑戰珠峰大本營，希望佢能成功完成，繼續推廣唔同嘅山上美景。

從練跑鍛煉意志 資深傳媒人 彭晴

現時喺Now TV及香港電台擔任節目主持人彭晴Jacqueline，跑左步已接近10年，最近呢幾年想有更大突破，於是參加左訓練班，展開左一班人的訓練生活。佢認為吸引人跑步嘅地方除左係裝備好靚，更加係一種測試自己能力的運動，而且大家都站在同一起跑線公平地較技。 從跑步鍛煉意志，令她由10公里，到20公里，到今天她即將挑戰全馬賽事。大家可能會問，你咁忙，又要兼顧家庭同忙碌嘅工作，點樣可以搵到時間跑步？彭晴話比各位知，跑步都可以教人做好時間管理，只要有心，一定可以調配到時間練習。

18年越野跑生涯 家偉教練

越野班教練家偉，自細因為居住地點近城門水塘而經常接觸大自然。工作後練習路跑和山跑，因而開展越野跑生涯。每年都會到外地比賽的他，最難忘莫過於一次全家到和歌山睇自己比賽。 擔任越野跑班教練，家偉認為可以與熱愛跑步的同學一齊交流、進步是很開心的事，而由於同學們都有一定水平，令教練們都要不斷更新自己，考慮不同的路線，讓同學有更好的體會。

團隊練習帶來的新突破 Hester Law

從大學開始接觸長跑至今差不多4年，最初只為跑好一場渣馬，但後來在太魯閣峽谷馬拉松中得獎的經驗令她對練習和比賽都更有衝勁。 現時九龍灣及香港仔班的她，由最初希望認識更多志同道合的朋友，到今年再加入Elite Team，她希望藉住一班人的互相推動，令她更努力地訓練，朝更大的突破進發。

學習、訓練、身教、領會 陸作恩

跑左步10年的陸作恩教練，因為中學老師的啟發而開始長跑生涯，又因為梁達威教練的指導而不斷進步。至今仍不斷花時間練習的他，身兼老師和教練，既將自己的知識傳授予小學生們，也在用心領會比自己閱歷豐富的跑步同學的人生經驗。 期待陸教練未來在不同領域再繼續成長，突破自己。

山上看世界 RMAC創會同學 May Lee

在2015年本會創會時已經加入的May，在這幾年一直幫跑會籌務同擔任了多場比賽的義工活動，是義工團的骨幹成員。 原來佢已經玩左5年越野賽，去年更試過在三個月內參加過三場100Miles嘅越野賽，雖然非常辛苦，亦令佢體驗到體能的重要性。May覺得香港很特別，在於市區同郊野距離很近，很容易就可以上山感受一下大自然，而最近的社會現況，亦令她在山上有別一番感受。

齊上齊落 一班人跑更開心 劉德龍

曾經叱咤本地中長跑界，現時是幾班的主教練龍Sir，認為現在跑步已不是只求刻苦和突破自己，他更喜歡一班志同道合的跑手一齊衝，一齊達成目標。 對於教學，他很想令學生們更有動力，而呢種動力就係來自於跑步帶來的開心，從而改變整個人的生活態度。