『心態決定境界』最想開開心心一直跑落去 Kristy

今次訪問嘅學員就係Weman當中嘅成員Kristy啦。

未做今次訪問之前，淨係知道Kristy係一個細細粒粒又開朗又跑得嘅女仔。估唔到Kristy一路以來喺運動嘅路上有咁多辛酸，曾經有厭食同埋暴食症、曾經喺三鐵比賽中途炒車。不過當中最令我動容嘅反而係Kristy喺訪問內容中對呢啲經歷只係輕輕帶過，更着重喺自己點樣保持正面同埋繼續堅持落去。真係令我驚嘆佢小小嘅身軀入邊有大大嘅力量呢!

 點樣開始接觸長跑

原來Kristy曾經喺小四嗰陣做體適能測試，9分鐘耐力跑意外地跑左千六米。Kristy同左佢當時嘅游水教練講，佢就想訓練Kristy玩水陸鐵人，開始教Kristy跑步。之後Kristy喺小學到中三都有玩下學界啲中長跑，但Kristy果陣又怕跑步腳粗，而學校田徑又淨係專注短途同跳遠，之後又有厭食症同暴食症，所以中四就專心讀書就冇再跑。

一直到大學畢業之後，Kristy覺得生活只係得番工作好無聊，咁啱見佢嘅中學師姐暨偶像粉紅大佬Leanne喺公司附近開班，就重新跑番。

加入Weman之後嘅改變

Kristy認為加入咗Weman之後訓練有系統咗好多，以前淨係上堂果課有課表，其餘時間都係自創啲野跑下，鐘意就easy/tempo/fartlek/interval都係隨心。但而加文少杰教練會俾一個月嘅programme，連pacing都有埋，令Kristy可以對每一課都有生理同心理準備。而且文少每課都會俾comment，令Kristy對自己嘅狀態更了解。Kristy亦提到喺weman仲有一班好supportive嘅隊友，可以一齊跑，仲要大家都係女仔，會好了解大家，咩女人心事都可以分享，仲話麻煩晒文教練湊佢地添。

長跑路上嘅啟發

Kristy喺第一次玩三鐵Ironman70.3嘅時候，單車去到75公里果陣因為落斜太心急，想追番之前上斜慢咗嘅時間，好快咁衝落去。但Kristy憶述當時自己技術唔夠好炒咗車，頭盔爆開咗，成個左邊側身損晒，半隻門牙崩咗，但附近冇救護站又冇工作人員。如果Kristy唔踩埋番去就要搬架單車著lock鞋行落山，仲要行15km，所以Kristy就硬住頭皮踩番去。當Kristy踩到轉換區播緊 ”What doesn’t kill you makes you stronger”，令Kristy好鼓舞，覺得自己咁都冇事點都要跑埋佢，最後1:51完成半馬部分，6:04完成整個賽事。 

呢場比賽令Kristy覺得「心態決定境界」哩句好啱，即使而加都未太拿捏到比賽個心態，Kristy仲笑言場場都想pb唔通場場都pb。但Kristy覺得要有決心同信心果陣先會跑到理想嘅成績，但有時俾自己太大壓力又會弄巧反拙，所以成日都要同自己self-talk下先得。 

長跑對自己嘅意義

Kristy認為長跑係一樣令到自己同人地唔同嘅野。Kristy就話自己唔係靚女，讀書又唔係叻，又冇一技之長，只係個普通打工仔。如果冇跑步，生活應該就得食訓痾同番工。Kristy仲話識佢嘅人都知佢好隨意好hea，只有跑步嘅時候，先會搵番份執著，先會見到佢認真少少，有火少少嘅模樣。Kristy表示最鐘意跑步嘅時候可以只專注一個目標，走想走嘅pacing，冇其他野要諗，又唔會有人煩住自己，好鐘意自己拎番生活主導權嘅感覺。仲話呢兩年如果冇跑步精神上支持住自己，應該會抑鬱。

 長跑路嘅終極目標

Kristy就話終極目標就係長跑長有，希望自己嘅身體可以負荷到訓練量。而短期嘅目標就係希望30歲前10km可以見到40分，之後就玩多啲長距離嘅比賽，亦想自己肌力可以增強，練成腹肌，繼續開開心心咁跑～