有人鍾意喺一日開始嘅時候跑，有人鍾意放工跑，唔知大家鍾意晨跑定夜跑呢﹖
我鍾意早晨跑步，享受日出美景，喜歡清晨寧靜，早起慢跑令我一天充滿活力，一早練完返工都精神啲專心啲，做嘢都起勁啲，食完晏有時間小睡5-10分鐘，充一充電繼續工作，如果工作上有突發事情例如要開會或各樣計劃導致加班都唔怕，因為早上已經練咗，晚上時間安排會更自由，如果唔洗加班，可以輕鬆慢跑放鬆或早啲返屋企食飯休息。
夜跑可以望住橙紅色嘅日落或夜空，有另一番感覺，可以讓我哋喺一日漫長工作後平靜下來，喺公司對住部電腦坐咗成日，個人都呆哂，收工換上跑裝跑返幾公里衝吓間歇感覺良好， 一日累積起來嘅壓力、煩惱同擔憂，似乎都會喺跑完出身汗後消失。
都市人，無論晨跑定夜跑，根據自己嘅情況進行選擇，揾到一個自己可以規律堅持下來嘅跑步時間，就能體會當中樂趣。
如果你有題目想我哋講多D，可以去以下網址輸入你嘅題目：
http://rmac.run/crystals-blog-idea
謝謝!
剛過去嘅星期日跑會有半馬測試，唔知你有無跑呢﹖有跑嘅你時間滿意嗎﹖我都有陪住大家一齊跑幫大家打氣，當日太陽有少少猛，跑到後半程開始升温，可能影響跑手們發揮，時間未必係心目中最佳，但喺依段時間仍保持訓練已難能可貴，好好休息調整後再來，一定能再次突破自己！💪🏻
依個星期就係新年🐮大家牛年有咩大計呢﹖限聚令下大家去拜年要小心啊，我指食嘢要小心呀😂新年實在有太多好嘢食，蘿蔔糕、年糕、芋頭糕、馬蹄糕、煎堆、蛋散、油角、糖蓮子、糖果、朱古力依啲賀年食物，大部分都較高卡路里高脂高糖，仲好熱氣，食得多容易喉嚨痛，雖然無比賽，但都少食為妙，食多咗就跑多啲啦！🦵🏼
🐮祝大家牛年身體健康！平平安安！🧧
Photo Credit: Garyhomme
放低咗跑步一段時間，對跑步依個朋友生疏咗，唔緊要，只要慢慢同佢建立返關係，好快可以同佢做返朋友。萬事起頭難，要’的’起心肝跑，建議從輕鬆慢跑開始，建立返有氧耐力打好基礎，將下降咗嘅體能慢慢提升，跑之前記得熱身，步速切忌太進取，沉住氣慢慢跑享受跑步嘅樂趣，跑返一兩星期後可以加啲變化，間歇跑衝刺跑變速跑都可以，可由短距離100-200米開始，刺激肌肉和心肺，也可揾啲小斜路衝上斜練步幅和腿部力量 (落斜輕鬆jog)，讓身體適應返強度訓練，適應後除咗可以增加慢跑時間/距離/次數外，亦可增加間歇跑距離，跑完記得拉筋放鬆，有時間可以喺屋企做體能，訓練有多啲變化無咁悶。心態上不需太在意訓練時間上嘅要求，目標培養返跑步習慣，好似儲錢咁累積返來，只要有跑就得，跑得開心自然就會繼續跑！
狀態有起有跌，唔會一直維持高位，週期性訓練（Periodization) 係我喺運動科學中最常運用到，週期性訓練一般有4個階段，一般準備期，專項準備期，比賽期和休賽期。
一般準備期時訓練量較高強度較低，基礎有氧、基礎速度、基礎肌力都喺依個階段建立。經過基礎期嘅訓練，身體已準備好迎接下一階段挑戰 - 專項準備期，視乎目標係全馬/半馬/10km/中長距離而定訓練課表，專項訓練包含長距離間歇跑和配速跑，提升專項能力，依個階段訓練強度相對高，要做好恢復，防止受傷。
賽前調低訓練量同強度讓身體肌肉有機會恢復修補，以達到最佳比賽狀態，比賽期嘅狀態應該處於頂峰，依個時候要將最好表現拎出嚟，好好享受過程，盡情發揮。完成目標就到休賽期，訓練量同強度會顯著調低，促進身心復原，為新一個訓練週期做好準備。
身體需要多樣化嘅刺激才會進步，刺激後需要時間恢復才能吸收，唔洗擔心狀態起跌，要聽從身體感覺，有時候多休息一日，或者下次訓練時就能讓狀態爆發。
初初跑步自己喜歡著船襪，因為衣櫃得依款襪😂記得有次師姐話要去買襪跑步，先知原來有跑步襪，真專業！當時嘅我當然冇買啦，因為唔覺得自己著緊嘅襪有咩問題，又殘又舊都繼續著，腳趾公穿窿/腳踭磨薄咗就換另一隻腳著，兩隻都穿哂窿無辦法再著先捨得扔。直至後來腳踭成日磨損、腳底又不時起水泡、有啲襪質地太滑跑得唔暢快，先認真考慮需要跑步襪。
襪有厚有薄，試過唔同配搭，個人喜愛薄短襪襯上比賽鞋同快跑鞋，鞋身較貼腳，觸感強啲，加上包住整個腳腕感覺有多啲保護 (有時腳腕貼KT tape保護唔怕甩)，一著就愛上。如果鞋較鬆，會選擇厚短襪，天氣凍可選擇長襪，包埋小腿保暖。
著咩襪最適合自己跑要試過先知，著上去跑得舒服最重要。
