跑步時有啲位置重複摩擦時容易將皮膚擦傷，常見位置有大髀內側、腋下、手臂內側，我會搽凡士林保護，仲有一啲地方我都會搽凡士林，就係bra top底圍同肩帶位置，而男士會貼乳貼保護自己，減少摩擦免得磨損，好痛㗎🙈
至於對腳，腳跟對上位置都有刮損嘅機會，著高少少嘅襪可避免依個情況。腳跟位置也有機會磨損/磨到起水泡，可能係對鞋size太fit/太大，厚襪薄襪都有影響，試吓唔同嘅配搭去改善情況。
護膚心得💕
冬天天氣乾燥，皮膚容易爆坼，平時做好保濕，啲皮膚會舒服啲。我習慣沖完涼搽護膚霜，依個時候身體最乾淨，即時為皮膚保持水分。至於塊面，我搽保濕面霜為主，日頭加防曬，夜晚就搽厚少少瞓覺，不時敷保濕面膜，滋潤皮膚，咁就無咁易爆坼啦
冬天寒冷嘅天氣讓人懶洋洋躲在家中，特別係個被竇，好多人懶床懶到鬧鐘響咗幾次都繼續懶緊，一啲起身嘅動力都無，但始終要起身返工又或跑步，係咩驅使我揭開張被起身﹖
通常令我的起心肝去跑步係諗起自己目標，要達到目標就好似銀行戶口儲錢咁，儲里數儲狀態，而每次訓練都係一小步，練就有唔練就冇，練咗係自己嘅，無人可以拎走，諗起自己會因為今日匿喺被窩到比賽嘅時候會幾咁樣衰，我就會起身換衫刷牙去跑步。
雖然唔知幾時有比賽，但長跑沒有奇蹟，只有累積，一直裝備自己，為下場比賽作準備。要記住時間唔等人架，如果你之後仲要返工返學約左朋友，咁你喺被窩多一分鐘就跑少一分鐘，唔好再喺被窩入面發夢啦，快啲起身出去追夢啦！
今年嘅跑步生活上充滿著挑戰，好多嘢都控制唔到... 但總有啲嘢自己可以控制嘅，如何面對困難，用咩心態去應付，都可以自己選擇，而我選擇勇敢去試、堅持才會見到希望去渡過每個挑戰，捉緊自己控制到嘅嘢👊🏻
1月喺隻身去麗江大理訓練，渡過冷冰冰嘅新年
2月喺日本渡過，參加第74回香川丸龜國際半馬拉松錦標賽，以1:19:41突破自己，之後留喺日本訓練，獲益不少 (原本返香港跑渣打，但因大會要全面配合政府嘅防疫工作而取消)
3月返香港準備海外馬拉松賽事，可惜疫症影響賽事被迫延期或取消，月尾更出來苦肉計 -「拗柴」專心休息療傷，一抖就5星期
4月碰上疫情第二波，安在家中養傷，只能有限度做體能，就當俾身體抖吓養足精神體力好返再努力練過
5月積極治療同慢慢恢復，可以慢慢行返，平時跑嘅吐露港當時行/躝到大王爺廟已經消耗一半體力，有時行完隻腳又腫番又要抖返一兩日，不過月尾有好轉，終於可以慢慢跑喇
6月慢慢練返跑，開頭慢跑為主，由15’續步加到45’，視乎腳嘅反應而訂之後嘅訓練，間中可間歇跑，狀態慢慢有起色
7月訓練重上軌道，可惜疫情殺來第三波，無運動場所訓練之餘，喺户外運動亦要戴口罩，真係一大煩惱🤯立即買來training mask，訓練改到吐露港，大尾篤，城門水塘，萬宜水庫等地方，夏熱天時仲要戴住口罩，訓練強度須降低，盡量保持有氧耐力同基本體能訓練
8月如是搵少人嘅時間同地方練習，月中得知有機會去世界半馬拉松錦標賽 (原本3月舉行，疫情原故延至10月17)，便早起避暑跑長課同練強度，準備下個月頭嘅測試
9月慶幸疫情有所緩和，運動場所開番，做咗5000m測試檢視狀態，成績不過不失，仲有6星期比賽，好好把握每日訓練，將狀態再提升，教練早已安排訓練大綱，不過身體有任何狀況便立即提出，再商量接下來嘅訓練，練習當然有好有壞嘅時候，但整體也能按計劃完成
10月田總確認會派隊出賽，為我哋準備好哂所需文件同防疫用品，我只需專心訓練，由於太耐無比賽 (原本有田徑測試賽，因疫情延期) 教練安排10000m測試，盡量將狀態調整好應戰。到出發天颱風「浪卡」到港，8號風球早上完成離港前最後一課後，執好行李晚上出發，雖然行程一波三折，但難得有機會出賽要好好把握，盡力做好自己，受傷後每天嘅努力、疫情下夏天嘅汗水、備戰期間嘅付出無白費，以1:19:08 PB完成 #努力不會白費總有成果💕 (關於整個比賽嘅詳情，可以睇番10月19號嘅post)
回港隔離14天🚴🏻♀️
11月隔離完重投訓練，2星期無跑，開始時的確辛苦，慢慢恢復後訓練再次上軌道，為12月田徑系列賽做準備
12月打算比賽之制第四波疫情來到，運動場所再次封閉，比賽取消，原訂田徑錦標賽延期也取消了，唯有繼續搵地方練習
太多事情不似預期，能做嘅，就係珍惜眼前所有，珍惜每一天，每樣嘢得來不易，盡力做好自己就無悔，學懂感恩同珍惜，希望2021會更好！
天氣轉冷🥶大家要著夠衫去跑步呀！
朝早慢跑我會以「洋蔥式」🧅著法去跑，上身打底著件長袖Nike Pro，再著件長袖加風褸，下身著長tight，跑暖咗除風褸綁喺腰，跑完即刻著返保暖，拉筋時唔好吹親，又或返到屋企先拉筋。
跑課表嘅話熱身可著外套長衫長褲保暖，熱好身會換短褲 (個人唔習慣著長tight練跑)，上身著定短袖喺入面，可加手袖，跑到熱先除長袖，練完著返哂衫cool down，用毛巾抹汗換返乾淨衫褲，唔好凍親。
冬天練跑的確要帶幾多衫，按個人需要可加手套🧤同帽，如果大風可加布口罩遮蓋口鼻，免得直接吸入凍空氣。
祝大家冬至及聖誕快樂！同屋企人團團圓圓開開心心🥰身體健康💪🏻
安全最重要！首先要揾個安全嘅場地，喺香港較少草地可以跑，大坑東遊樂場係個幾好嘅選擇，一圈大概750米，草地公眾開放，平時有人踢足球假日一家大細去玩耍，喺旁邊跑嘅時候要小心，避免意外發生。
另外，建議喺林路、越野路、草地進行中低強度訓練，或恢復性、調整性訓練，我一般會喺唔係重要訓練嘅日子去進行恢復慢跑鬆吓腳，高配速、高質量嘅訓練例如interval (間歇跑) tempo (配速跑) 不建議喺依啲路面進行，因為地面凹凸不平同太軟，高速跑時腳腕容易不穩而拗親，故當進行要求輆高嘅訓練時喺田徑場和平路較理想。
最後，盡量避免夜跑，怕視線不清，萬一路面有凹陥位踩到容易受傷。
依排疫情關係運動處所都須關閉，大家都要跑街，跑嘅時候要小心，注重個人衛生
