2021-01-04 寒冷天氣下如何有逃出被窩嘅勇氣﹖ Crystal
/冬天寒冷嘅天氣讓人懶洋洋躲在家中，特別係個被竇，好多人懶床懶到鬧鐘響咗幾次都繼續懶緊，一啲起身嘅動力都無，但始終要起身返工又或跑步，係咩驅使我揭開張被起身﹖
通常令我的起心肝去跑步係諗起自己目標，要達到目標就好似銀行戶口儲錢咁，儲里數儲狀態，而每次訓練都係一小步，練就有唔練就冇，練咗係自己嘅，無人可以拎走，諗起自己會因為今日匿喺被窩到比賽嘅時候會幾咁樣衰，我就會起身換衫刷牙去跑步。
雖然唔知幾時有比賽，但長跑沒有奇蹟，只有累積，一直裝備自己，為下場比賽作準備。要記住時間唔等人架，如果你之後仲要返工返學約左朋友，咁你喺被窩多一分鐘就跑少一分鐘，唔好再喺被窩入面發夢啦，快啲起身出去追夢啦！