2020-11-09 我經常跑的推薦路線 Crystal
/好慶幸自己住大埔，有好多地方可以跑，大埔海濱公園，吐露港和科學園係我最常跑嘅路線。
沿住林村河一直跑到大埔海濱公園，園內有不少小徑，鍾意喺入面兜上兜落又得，沿海濱跑到吐露角亦得，慢慢跑唔經唔覺來回就跑咗~6km。
大埔海濱公園嘅另一邊係路面闊而平坦嘅吐露港–我最常晨跑嘅路線，清晨望住吐露港日出，由大王爺廟出發，沿吐露港和白石角海濱長廊一直跑到科學園 (~4.8km)，經過馬料水碼頭跑到孖橋 (~8km)，要跑長距離可以選擇轉右跑去沙田 (~10km) 或轉左馬鞍山 (~12km)，想跑吓斜路可以跑去梅子林，唔怕無路跑，沿途有洗手間，人有三急都唔驚。
有時跑直路跑得悶，會跑去大尾篤，由屋企出發經過一些小路，再沿汀角路跑到大尾篤巴士站 (~8km)，沿途路較窄、多彎和偏靜，跑嘅時候要小心，如想挑戰自己可以沿新娘潭路繼續往上跑練斜路 (美津濃半馬比賽部分路線)，跑夠就折返，帶定錢太攰可以搭巴士返屋企😂